أمانى وهيب تكتب العبرة بالنهاية

فعلا
ده كلام صح…العبره بالنهاية

لكن
.لما تكون مبتدى غلط..لازم تتعدل الحكايه..

ديما البدايات حلوه زى الهديه متزينه بشريط الهدايا

لكن لما تفتحها..بتلاقى اللى جواها ناقص مش كفايه
🖤🖤🖤
وفعلا كمان ..
الظروف والوقت بيحكم ف المعامله

تلاقى ف البدايه حب جارف وحنيه وأحاسيس جواك متوتره كأنك عامل عامله

تاخد وتاخد وتاخد حتى من غير ما تطلب تلاقى كل المحبه الكامله

وفجأة.
كله يتغير..لا تاخد..ولا تعرف تدى لان حبيبك رافض منك حتى المكالمه
🖤🖤🖤
فعلا
حاجه متعبه ..إن حبيبك بعد القرب يتجاهلك

ساعتها يكون قدامك..وتقرر انت ..أنه فعلا ما يستاهلك

الحب مش كل حاجه. اهم حاجه كرامتك .وقلبك . ومشاعرك دوول هما بس اهلك

ف بلاش تعاتب ع البدايه ..ساعات النهايات بتكون لصالحك واريحلك

اصعب حاجه بجد انك تمثل انك مبسوط..

وقلبك من جوه مكسور بينزف وبيموت.

وانك عاوز تثبت للى حواليك أن فى ايدك كل الخيوط

متحكم ..صالب نفسك وابتسامتك ماليه وشك.وكل شئ تمام ..مظبوط

تمثيل السعاده ..بقا عاده .بقا احتراف فى الوش محطوط

لكن اللى جوه القلب…مليان اهات جوه السكوت

مليان جراح وايه يعنى..ماهو كل ح يعدى ويفوت..

هو مين،يستاهل يشوف دمعى دى دموعى غاليه حتى لو من غير صوت

محدش يستاهل الحب لان الحب عندكم. عاوزينه منى بشروط.

لكن…
عندى امل
يجى يوم اعيش فرحان من غير اى ضغوط

أو على الأقل الاقى قلب صادق يحتوينى ..وبكده مش ح امثل انى مبسوط.

صوره حلوه من كل الزوايا

بتعبر عن مراحل الزمن كأنها حكايه

وعينك لما تشوفها فورااا تقول ناس عجوزه وتأثير الزمن واضح وبعنايه

بس استنى متحكمش بالمظاهر
ده شاب بيعزف وبنوته زينه الصبايا

بص بعيون الامل ح تلاقى الفرحه طله وبسمه الخجل واضحه..دقق كده معايا
🌷🌷🌷
فعلا..ممكن تحكم من بعيد على منظر تفتكره صعب

لكن لو دققت النظر بعين الحب

ح تلاقيه قدامك لوحه كأنها بتتكلم وخطوط الرسام..تبين اد ايه القرب

هو ده حال الدنيا…ياما بناخد اول الكلام…ويحصل بسببه جدال شد وجذب

بنحكم ..ونشوف بنظره تانيه ..وبنجيب ل نفسنا وجع القلب

لكن
الله نظرته لينا غير نظره الناس
نظرته كلها حب